KI gav Gukild karbosmell: – Kjente eg var på stranda i Normandie

– Eg har hatt eit mareritt av eit løp, innleier Emil Gukild.

Som ein del av oppladinga til det store målet til skisesongen, Birkebeinerrennet i midten av mars, tok Skiklubben-profilen i bruk nye verktøy for å optimalisere kosthaldet sitt før skirenn.

Det viste seg å vere ein kostbar tabbe.

Les kommandoen Gukild la inn lenger ned i saka.

– Eg har jo delt kor mykje eg har ete med Anders (Aukland), med Øystein «Pølsa» Pettersen, med Petter Skinstad og andre, erfarne fjellfolk.

– Der har eg fått høyre: «du er ein idiot».

Det fortel Gukild i den nyaste episoden av podkasten Skiklubben.

– Mykje godteri og ris

NRK-profilen har dei siste vekene ete det KI har anbefalt.

Det førte til ei stor kosthaldsendring.

– Den har bede meg om å ete enorme mengder karbohydrat dei siste to dagane før skirenn, seier Gukild.

– Kor mykje snakkar vi då, spør medprogramleiar Silje Nordnes.

– Det er vel 2,5 gonger så mykje som eg pleier å ete. Det har blitt mykje godteri og ris, for å seie det sånn, ler 33-åringen.

Det fekk han erfare konsekvensane av.

Verre enn då han bæsja på seg

For halvanna veke sidan gjekk Gukild det tradisjonsrike Montebellorennet i Sande i Vestfold.

Proppfull av både karbohydrat og sjølvtillit stilte han seg opp ved startstreken som nummer ti, med mål om å vere blant dei første i mål.

– Eg vil tippe at 130 løparar passerte meg dei første ti kilometrane. Eg tullar ikkje, eg kjente eg var på stranda i Normandie i 1944, spøker han i podkasten.

Han fortset:

– Hovudgrunnen til at eg hadde det forferdeleg, var at eg hadde lyst til å spy. Eg gulpa, eg har aldri vore nærare å trekke meg frå eit skirenn. Enda nærare enn då eg dreit på meg i Marcialonga.

Her kan du få eit gjensyn med då Gukild bæsja på seg under fjorårsutgåva av det italienske langløpet.

Kjensla Gukild hadde i skogane i Vestfold skildrar han som «tre porsjonar pinnekjøtt på julaftan med alt til».

Funne svaret

Det heile enda med at Gukild, som altså starta som nummer ti, blei nummer 105 i mål. Over halvtimen bak vinnaren Hans Petter Berg Rolke.

Før knallharde Marcialonga i slutten av januar nytta Gukild seg også av kunstig intelligens. Då med same resultat.

– Eg hadde det heilt forferdeleg den første timen. Då lurte eg på om det kunne vere Imodium, høgda, tungt terreng, regna?

– Det har eg altså svaret på no: eg åt altfor mykje!

Åt 18 poteter

Emil Gukild er rett nok ikkje den einaste som har ete altfor mykje karbohydrat i forkant av viktige skirenn.

Skiklubben-programleiar Anders Aukland, som også er fire gonger Birken-vinnar, kunne fortelje at i 2001 gjorde bror hans Jørgen ein liknande tabbe.

– Det var første gong han gjekk Vasaloppet. Han hadde satsa knallhardt og var sinnssjukt sterk. Men kvelden før åt han 18 poteter til kveldsmat. Poteter var bra «karboloading» den gongen, fortel han.

– Midt i rennet stod eg og venta på han ved ein drikke-post, men han kom aldri. Han måtte bryte rennet, for han kasta opp. Han var heilt ferdig, ler storebror Aukland.

Mannen med både OL- og VM-gull på samvitet har eit klart tips til kva ein bør ete i dagane før viktige konkurransar.

– Det er dumt å ete veldig annleis enn det ein er vant til. Men dei siste par dagane er det heilt rett at ein skal ete mykje karbohydrat. Så er det sånn at kroppen berre klarer å ta til seg ei viss mengde. Det er overraskande kor lite dei beste utøvarane et, meiner han.

Dette meiner Aukland du bør ete

Aukland anbefaler at ein dei siste to dagane tar bort grønsakene, fiberrik og tung mat og ein del kjøtt, og byter det ut med for eksempel ris og meir brød med søtt pålegg.

– Det bør ikkje vere mengda ein legg på med, ein berre vrir andelen, seier Aukland i podkasten.

For den skiinteresserte kan ein gle seg med at frå og med onsdag kjem Skiklubben til å legge ut daglege episodar i samband med ski-VM i Trondheim.

Då skal Emil, Silje og Anders analysere og snakke om alt som har skjedd i og utanfor skiløypene i Granåsen.

– Og når den siste søndagen kjem, er det jo berre seks dagar til Birkebeinerrennet, minner Gukild om.

Her kan du høyre fleire episodar av Skiklubben.