Den liberale høgsterettsdommaren Stephen Breyer går av med pensjon

Breyer har vore dommar i USAs øvste domstol i over 27 år. Han planlegg å tre av ved slutten av den noverande perioden, som i år er i juni, skriv mellom anna NBC.

To kjelder har òg stadfesta avgangen til nyheitsbyrået AP. Breyer har sjølv ikkje kunngjord avgangen endå.

83-åringen er ein av tre gjenverande liberale dommarar. Dommarar i USAs høgsterett sit normalt livet ut, og det ligg dermed stor makt i utnemning av dommarar.

Det er opp til president Joe Biden å nominere ein ny kandidat til å ta Breyers plass. Nominasjonen må sidan bli godkjend av Senatet. Fleire liberale aktivistar har bede Breyer om å tre av no medan Demokratane har fleirtal både i Senatet og innehar presidentvervet.

Leiaren for Senatets fleirtal, Chuck Schumer, har etter nyheita om Breyers avgang sagt at Bidens nominasjon vil bli raskt vurdert av justiskomiteen i Senatet, og sidan vurdert og godkjent av heile Senatet i eit «overvegd raskt tempo».

Biden har tidlegare sagt at han ønskjer å nominere ei svart kvinne til vervet som dommar i høgsterett. Det ville i så fall vore første gong det skjer.

(©NPK)