Slik ser ordførarkabalen i Agder ut

I Flekkefjord får Torbjørn Klungland fornya tillit etter at Frp gjort eit kjempeval, med nesten 50 prosent av stemmene.

I Kvinesdal får truleg Per Sverre Kvinlaug (KrF) ny tillit. Partiet gjekk fram 2,6 prosentpoeng til 28,4 prosent. Næraste konkurrent var Arbeidarpartiet, som enda med 19,4 prosent av stemmene.

Senterpartiet har hatt ordføraren i Hægebostad dei siste åra. Det kan det bli ei endring på no. Høgre får 31,7 prosent, fram 11,7 prosentpoeng og er kommunens største parti. Dermed kan truleg partiets Jan Petter Gysland ta over ordførarklubba.

Frp gjorde eit brakval i Lyngdal med 32,7 prosent, fram 21,3 prosentpoeng samanlikna med valet for fire år sidan. Truleg ser det lyst ut for Unni Nilsen Husøy som ny ordførar i Høgre-bastionen. Høgre gjekk kraftig tilbake under årets val.

I Åseral har Arbeidarpartiet styrt skuta dei fire siste åra. Dei er størst også etter årets val, og kan danne fleirtal med Senterpartiet. Dermed held truleg Inger Lise Lund Stulien som ordførar.

I Vennesla ser det lyst ut for attval for KrFs Nils Olav Larsen. Partiet fekk 24,6 prosent av stemmene og er det største partiet i kommunen igjen.

Arbeidarpartiet har styrt Bykle dei fire siste åra. Det vil dei truleg også gjere i neste periode. Det betyr at Hans Blattmann kan bli ordførar for første gang.

I Valle har Arbeidarpartiet hatt ordføraren den siste perioden. No er det stor spenning knytt til kven som skal styre kommunen vidare. Senterpartiet er kommunens største parti, trass i sterk tilbakegang. Den nye Bygdelista Valle (BL) har kapra kvar fjerde stemme i kommunen. Ordførarkampen står mellom Lars Tarald Myrum (Sp), Kim Pedersen (Ap) og Georg Sørmo (BL).

I nabokommunen Bygland går det mot Høgreordførar dei neste fire åra. Anne Eikerapen ligg an til å overta etter Arbeidarpartiets Sigbjørn Fossdal.

I Evje og Hornnes er Arbeidarpartiet framleis det største partiet, trass i klar tilbakegang frå førre val. Her kan derimot Høgres Finn Bjørn Rørvik stikke av med ordførarkjeda, ved å danne fleirtal med Venstre og KrF. Svein Arne Haugen (Ap) har vore ordførar i den siste perioden, og kan framleis bli sitjande.

Sitjande ordførar i Iveland, Terje Møkjåland, har vind i segla og går fram 7,2 prosentpoeng til 28,7 prosent. Men Høgre er kommunens største parti med 30,4 prosent. Dermed kan Jan Andre Myhren bli ny ordførar i kommunen.

I Åmli går det mot skifte. Senterpartiets Bjørn Gunnar Baas har vore ordførar dei siste fire åra. Arbeidarpartiet overtek no som det største partiet i kommunen med 39,9 prosent. Dermed kan det vere duka for Hans Fredrik Tangen som ny ordførar. Han har tidlegare vore varaordførar i kommunen for Høgre, før han melde overgang til Ap i førre periode.

I Kristiansand har Høgre gjort eit kjempeval med 29 prosent av stemmene, ein oppgang på 11,2 prosentpoeng frå 2019. I sørlandshovudstaden blir truleg nykommaren Mathias Bernander ordførar. Høgst truleg får han med seg KrFs Charlotte Beckmann Finnestad som varaordførar. Med Frp på laget har partia 50,5 prosent av stemmene.

I Birkenes har Høgre gjort eit godt val med 27,3 prosent av stemmene. Det er ein oppgang på 5,3 prosent frå 2019. I dag er det Senterpartiets Gyro Heia som er ordførar, men partiet fall med 11,7 prosentpoeng og enda på 21,5 prosent. Dermed kan det ende opp med at tidlegare ordførar Arild Winsland (H) på nytt inntek ordførarstolen.

I Sirdal har Jonny Liland (Ap) vore ordførar den siste perioden. Men ved dette valet taper partiet 8,7 prosentpoeng og endar på 31,5 prosent. Samstundes tek Senterpartiet innpå med 25,9 prosent av stemmene. Dermed utfordrar Thor Jørgen Tjørhom (Sp) sitjande ordførar.

Lillesand har vore styrt av Høgres Einar Holmer-Hoven. Det held truleg fram også dei neste fire åra. Høgre er det største partiet med 29,6 prosent av stemmene.

Også i Tvedestrand som har regjert dei siste fire åra. Slik kan det også truleg bli den neste perioden. Marianne Landaas sitt parti fekk 32,3 prosent av stemmene, ein framgang på meir enn 10 prosentpoeng.

I Vegårshei kommune kan det gå mot maktskifte. KrF er framleis det største partiet med 36,1 prosent. Men Arbeidarpartiet og Senterpartiet kan danne fleirtal i det nye kommunestyret. Dermed kan Aps Arne Lindtveit bli ordførar. KrFs kandidat er Kjetil Torp, som altså er sitjande ordførar.

I Gjerstad ser det ut til at Høgre får ordføraren. Kvar tredje stemme har gått til partiet. Dermed kan Steinar Pedersen truleg halde fram som ordførar. Partiet hadde ein framgang på 19,2 prosentpoeng til 33,1 prosent.

I Farsund blir det bytte av ordførar. Arbeidarpartiets Arnt Abrahamsen, som har vore ordførar i to periodar, må gje ifrå seg ordførarkjeda til Frps Ingrid Merethe Williamsen.

Lindesnes kommune har vore styrt av Arbeidarpartiet dei siste fire åra. Det blir det slutt på no. Frps Alf Erik Andersen er ein heit kandidat. Men også Venstres Randi Fredriksen og Høgres Paal Pedersen lurer i kulissane.

I Arendal går det mot ein ny periode med Robert Cornels Nordli frå Arbeidarpartiet. Ap gjorde eit sterkt val og gjekk fram fire prosentpoeng til 30,7 prosent.

I nabokommunen Grimstad blir det heller ingen endring på ordførarkontoret. Høgres Beate Skretting held truleg fram, etter at partiet fekk 24,3 prosent av stemmene, og er det største partiet i kommunen.

Risør har vore styrt av Arbeidarpartiet dei siste fire åra. Etter årets val er Høgre og Arbeidarpartiet like store. Her blir det ein kamp mellom Elen Lauvhjell (Ap) og Kai Magne Strat (H) om ordførarklubba.

I Froland blir det spenning om kven som skal styre kommunen. Arbeidarpartiet er kommunen største parti med 22,7 prosent. Inger-Lene Håland (Ap) kan bli kommunens første kvinnelege ordførar nokosinne. KrF, som har ordføraren i dag, er nest størst med 21,9 prosent. Dermed kan det heller ikkje utelukkast at Ingunn Fjærbu Roppestad blir ordførar. Frps Stian Omdalsmoen opplever stor framgang, og får også fire mandat i det nye kommunestyret.