Samanstøytar på grensa mellom Armenia og Aserbajdsjan

– Ved midnatt tysdag sette Aserbajdsjan i gang intensive bombardement med artilleri og skytevåpen med høg kaliber mot armenske militærstillingar i retning byane Goris, Sotk og Jermuk, melder Armenias forsvarsdepartement i ei fråsegn.

Dei skriv også at Aserbajdsjan skal ha brukt dronar.

Samtidig skuldar Aserbajdsjans forsvarsdepartement Armenia for «storskala undergravande handlingar» nær distrikta Dashkesan, Kelbajar og Lacin på grensa, og legg til at stillingane deira vart skotne mot.

– Det er tap blant aserbajdsjanske soldatar, heiter det i ei fråsegn. Dei oppgir ikkje kor mange soldatar som skal vere drepne.

Sidan slutten av krigen om den omstridde Nagorno-Karabakh-regionen i 2020 har det komme hyppige meldingar om skotveksling langs grensa mellom dei to landa.

USAs utanriksminister Antony Blinken seier han er djupt bekymra over situasjonen som no går føre seg på grensa, inkludert meldingar om angrep mot busetjingar og sivil infrastruktur.

– Som vi lenge har sagt, finst det inga militær løysing på konflikten. Vi ber innstendig om ein uvilkårleg slutt på dei fiendtlege, militære handlingane, seier han i ei fråsegn.

(©NPK)