Amanda til Anne Margaretha Oskal (35) for beste kostyme

ON: Norga lea rihkkon olmmošvuoigatvuođaid

Ovttastuvvan našuvnnaid (ON) olmmošvuoigatvuođakomitea moaitá Norgga Alimusrievtti duomu Jovsset Ánte Sara-áššis.

Olmmošvuoigatvuođakomitea lohká ahte duopmu rihkku olmmošvuoigatvuođa 27. artihkkala.

Sara advokáhtta, Trond Biti, lei jáhkkán ahte ášši lei dušše biddjojuvvon muhtin skuffii, ja danne son hirpmahuvai go oaččui cealkámuša.

– Cealkámuš doarju dan maid diggegoddi, lágamánneriekti ja mun leat oaivvildan ahte lea riekta. Lei hui buorre dovdu, dadjá Biti

Jovsset Ánte Sara mielas lea proseassa leamaš guhkki ja lossat.

– Lea dieđus bahčá dovdu go bákkuin čađahedje dan unnideami, ovdal go ON ollii vástádusa buktit. Dat dagahii ahte fertejin eará čovdosiid gávdnat, muitala son.

– Dát lea dat maid lean čuoččuhan ovttat ládje, dat lea boasttuvuohta dahkkon.

Dál vuordá Jovsset Ánte ahte stáhta njulge boasttuvuođa.

– ON gohčču Norgga stáhta njulget daid boasttuvuođaid mat leat dahkkon. Mun sávan ja vuorddán ahte dat čuovvulit dan duomu. Jus dan eai čuovvul de oalle lea katastrofa buot sápmelaččaide. De ii leat 27. artihkkalis mihkke ávkkiid.

ON bivdá Norgga dieđihit mo rihkkun lea njulgejuvvon ovdal go leat gollan 180 beaivvi.

– Mii fertet dál geavahit veaháš áiggi oahpásnuvvat lávdegotti cealkámuššii, ja geahčadit makkár váikkuhusat das leat dán áššái, dieđiha Eanandoallo- ja biebmodepartemeantta.

Advokáhta Trond Biti muitala sii fertejit árvvoštallet galget go bivdit ášši ođđasit gieđahallojuvvot duopmostuolus, “gjenopptakelseskommisjonen” bokte.

Saras ii leat šat siidaoassi, ja bargá bohccuiguin iežas eatni siidaoasi vuolde Jalgon-siiddas. Siidaoassi mii sus lei Fálas lea dál su viellja namas.

– Gažaldat lea dalle ahte lea go oba vejolaš ge, lea go son dan posišuvnnas ahte sáhttá dan dahkat, vai lea go su viellja gii ferte dan dahkat? dadjá Biti.